Hier sit ons nou – werklik 50 jaar later – en aanskou mekaar, meestal op ‘n skerm! En ek sit in die buiteland waar ek tans my ou man by die huis oppas.

Na matriek het ek begin met B.Cur (Verpleegkunde) by TUKS. In 1980 het ek dit voltooi en toe verder gestudeer in verpleegonderwys (diploma) en gemeenskapsverpleegkunde (honneursgraad), wat ek in 1986 voltooi het.

Ek is getroud en het in 1982 ’n dogter, Hildemarie, gehad (sy is nou ’n trauma-spesialis in Hobart, Tasmanië), en in 1984 ’n seun, Fanie, wat nou ’n ouditeursfirma in Geraldton, Australië bestuur. Ek het verpleeg in ortopedie, kinderpsigiatrie, algemene verpleegkunde en verpleegonderrig. My onderrigning het hoofsaaklik gefokus op toegepaste sosiologie, sielkunde, gemeenskapsverpleegkunde, intensiewe sorg en kliëntediens.

Die sportiefste wat ek ooit was, was toe ek in 1989 valskermspring aangepak het – en toe drie maande in gips deurgebring het! Ek het baie gedans op universiteit en gereeld deurnagdiens gedoen by die JOOL. Ek het ook graag in die koor gesing op skool en so ’n bietjie tennis en hokkie gespeel.

In 2003 het ek en my tweede man, Jan Joubert, geëmigreer na Perth in Australië. Ons het baie 4×4 gery en getoer – hier én in Suid-Afrika – en selfs ’n plastiekherwinningsfabriek begin. Ons woon baie lekker, het heelwat Suid-Afrikaanse en ander vriende, en geniet die natuur baie.

Ek is só jammer dat ek nie die reünie kan bywoon nie, maar stuur asseblief vir my foto’s van al die liewe ou maats.

Ek wens vir julle almal ’n heerlike, gelukkige lewe toe!