Ek is gebore in Leiden, Nederland, waar my pa sy doktorsgraad in die regte voltooi het. Daarna het ons teruggekeer Pretoria toe en in Lynnwood gaan woon.

Op skool was ek ietwat van ’n sluiper, maar dit het verander toe ek Tukkies toe is, waar ek vir die eerste drie jaar in die koshuis gebly het. Daar het sosiale aktiwiteite dikwels akademie oorskadu. Ek was saam in die klas met Almarie Kolbie, Japie Vorster en Herman Krull – die laaste twee baie goeie studente.

Ná ses jaar het ek my LLB verwerf en my klerkskap voltooi, waar Etienne le Roux saam met my gewerk het. In 1983 is ek as prokureur toegelaat en het ook die akteseksamen afgelê. Sedertdien praktiseer ek as aktevervaardiger en gaan ek elke dag Aktekantoor toe.

In 1985 is ek getroud met Willem Theunissen, wat twee jaar voor my op Hoërskool Menlopark was. Ek het voltyds gewerk tot 1988 toe ons seun Louis gebore is; daarna het ek deeltyds gewerk. In 1990 is ons tweede seun, Heinrich, gebore. Beide seuns het ook Menlopark toe gegaan.

Na 45 jaar in Pretoria het ons Kaapstad toe getrek waar Willem ’n takkantoor gevestig het. Aanvanklik was dit vir my ’n aanpassing – veral die weer – maar ek geniet dit nou baie.

Ons is maar ’n rustige klomp. Beide seuns is prokureurs en is ook met prokureurs getroud. Heinrich en sy vrou werk saam met ons, en Louis se vrou werk by ’n ander firma. Om bietjie balans te bring, het Louis besluit om by ABSA te werk.

Ons het drie kleinkinders: ’n tweeling – ’n seun en ’n dogter – en net 16 dae later is nog ’n seun gebore. Ek noem hulle die “drie-ling.” Gelukkig bly al ons kinders hier in die Kaap en sien ons hulle en die kleinkinders gereeld.

Beide ek en Willem werk nog elke dag – hy voltyds en ek deeltyds – en ons beplan nie om gou af te tree nie. Ons reis graag oorsee en was al op interessante plekke soos Rusland en China. Verder gaan ons gereeld na die familie se kothuis in Hermanus, en na Sabiepark – ’n wildreservaat langs die Sabierivier naby die Krugerhek.