Ek het in Graad 2, as ’n plaasseuntjie vanaf die Bethal-distrik, by Laerskool Menlopark aangesluit. Mevrou Maas en Mevrou Erasmus het my onmiddellik die bynaam “Bethal” gegee. Skool was nie vir my ’n uitdaging nie – ek het geleef vir sport en speel.

My ouer broer, Jannie, het na veelvuldige harsingskuddings in 1967 ’n ligte breinbloeding opgedoen. Hy moes weer leer loop, praat, en linkshandig skryf. Maar hy het herstel. Ongelukkig het hy in 1972 weer ’n breinbloeding opgedoen en is in sy matriekjaar oorlede.

Aan die einde van 1970 is ek self gediagnoseer met Herhalende Harsingskuddingsindroom – hoofsaaklik weens rugby en ander sportbeserings. Hierdie is ’n verwoestende toestand wat jou sig aantas, migraine-hoofpyne, geheueverlies, floutes, verlies aan spraak en nog veel meer veroorsaak. Die enigste sport wat ek nog toegelaat was, was atletiek. Skoolwerk het egter ’n probleem geword, want ek kon nie inligting onthou nie.

In 1974 is verskeie toetse en skanderings op my gedoen. Die medici het aanbeveel dat ek vir minstens een jaar geen sport beoefen nie – en verkieslik ook nie skool bywoon nie. My “gap year” 😊

Ek kon nie stil sit by die huis nie en het in Mei-maand ingeskryf by Capital College. Met meestal tuisstudie het ek daardie jaar matriek geslaag. Daarna het ek in 1975 vir Regte aan UP ingeskryf. Met die gereelde geheueverlies het die volume leerwerk my uitgemergel, en weens spanning het ek weer aanvalle ervaar. Na my tweede jaar het ek besef ek moet my lewe vereenvoudig, en ek het vir diensplig by die Polisie aangesluit. Na drie jaar diens kon ek my studies voltooi.

Twee maande as ‘n “article klerk” was genoeg – ek het by ’n diamantmaatskappy aangesluit en my GIA-diploma verwerf. Teen 1984 het ek besluit om die stadslewe agter te laat, en ek het ’n plasie buite Cullinan gekoop waar ek ’n ou sandsteenhuis gerestoureer het.

Ek het altyd belang gestel in die finansiële- en beleggingswêreld en verskeie kursusse en diplomas voltooi. In 1990 is ek “ge-headhunt” deur een van die groot finansiële maatskappye, en daar het ek my roeping gevind. In 1994 het ek my eie makelaarsfirma, Govserv SA (Pty) Ltd, gestig, met fokus op aftreebeplanning en beleggingsbestuur. Met my aftrede na 30 jaar het ek kantore in Pretoria en Somerset-Wes gehad, met ’n span van 19 FSCA-geregistreerde adviseurs. My onderneming is bekroon met “Diamant-status” by Sanlam en “Platinum-status” by Old Mutual. Ek het ook ’n belang in ’n boetiek-fondsbestuursmaatskappy.

In 1978 is ek met my pragtige vrou, Fienie, getroud. Ons het twee kinders – een in Nederland en een in Kanada – asook twee pragtige kleinkinders. In 2001 het ons verhuis na Bikini Beach in Gordonsbaai. Ek het onlangs ons huis verkoop – die trappe het te veel geword – en woon nou op ’n klein plasie net buite Gordonsbaai, waar die enigste wekker ’n hoenderhaan is.

Ek sal ongelukkig nie by die Reunie kan bywoon nie, maar liefde en groete vir julle almal.