Skool was vir my lekker. Ek het selfs ’n sertifikaat ontvang vir vyf jaar getroue skoolbywoning – danksy die onderwysers wat die teenwoordigheidsregister slegs in die oggende voltooi het.

Na skool het ek kontak behou met vriende soos Worsie, Suna, Plankie, Stella, Ettienne le Roux, Ferdinand Kriek, Chris Maree, Nappy, Loekie Louw, Anton Krüger en Tolie van der Vyver. ’n Paar van ons het gereeld gaan roei.

In 1981 het Elmarie en ek die knoop deurgehak. Sy was ’n onderwyseres by Hoërskool Menlopark, en was langer daar as ek.

Worsie het in sy stuk vertel van ons Kombi-dae – ek kan baie storietjies byvoeg, maar aangesien ons nou albei oupas is en meer ordentlik probeer wees, weerhou ek my liewers. Elmarie en ek het destyds ook ’n Kombi gehad, en ons het die hele land vol getoer, gekuier en gebly.

Ek het buitemuurs aan UNISA studeer terwyl ek by die Departement van Finansies en later die Staatsdienskommissie gewerk het. Daarna het ek as bestuurskonsultant vir internasionale maatskappye gewerk, meestal aan projekte vir die Europese Kommissie. Later het ek die finansies van ’n Chinese verskepingsmaatskappy in Sandton bestuur. Verkeer was ’n nagmerrie, en ek het daagliks met my motorfiets van Pretoria af werk toe gery.

Ons het baie tyd in Asië deurgebring, en in 2016, nadat albei ons kinders getroud is, het ons besluit om nuwe avonture aan te pak. Ons het in Asië gaan werk en tydens ons ruim verlof elke jaar die hele kontinent verken – van die Himalajas in Nepal tot met die Mekongrivier af see toe. Sedert ons terug is, is ons weer volstoom aan’t reis.

Ons twee kinders werk albei in die finansiële sektor: Kobus woon ook in Pretoria, en Carli bly in Mauritius – ’n uitstekende verskoning vir gereelde kuiers. Daar het ek onlangs geleer branderplank ry en was die oudste leerling nog by die plaaslike branderplankskool.

Verder verryk twee kleinkinders – wat natuurlik pragtig is (soos almal s’n) – ons lewe daagliks.