Grepe van die Verlede

Ek het eers later by julle in Menlopark aangesluit, nadat ek in Kenia gebore is en ’n deel van my laerskooljare in Hong Kong gehad het. As ek aan Menlopark terugdink sien ek Carel Bredel en dinkie-karretjies, Theo van Mazijk met albasters by die laerskool se fietsloods; Pieter du Toit en die fliek Ice Station Zebra; Gawie Nienaber by die book exchange in Esselen Straat; Pieter Cronje en “Man in Flight”-munte by die Shell-garage op Lynnwoodweg; Casper van Zyl ry loshande fiets na Waterkloof Sentrum; Fritz Bosch met die klanktoerusting in die skoolsaal; en Louis Botha op ’n motorfiets by St Alban’s College.

In Hong Kong het ons televisie gehad, maar in Suid-Afrika het julle TV eers in 1975 gekry, so ek moes die gemis opmaak deur na die radio te luister (Squad Cars, The Men from the Ministry en David Gresham se Springbok Radio Top 20), en bioskoop toe te gaan (James Bond in Goldfinger, Henry Cele in Zulu, Patrick Mynhardt in Majuba, en Clint Eastwood in The Good, the Bad and the Ugly).

Skaak en Doelwitte

In die vroeë 1970’s, het Bobby Fischer—destyds die jongste skaakkampioen in die geskiedenis van die VSA—ook die eerste geword om Rusland se oorheersing van wêreldskaak uit te daag en uiteindelik te verbreek. Die historiese wêreldkampioenskap wat in 1972 Reykjavik, Ysland gespeel is, het my baie geinspireer. Vasberade het ek weekliks liga-skaak gespeel totdat ek in 1975 Noord-Transvaal-kampioen geword het. Skaak het my geleer dat met ’n goeie strategie en foutlose uitvoering is enigiets moontlik. Gevolglik besluit ek om my lewe dienooreenkomstig aan te pak en trek ek tien doelwitte op wat ek die volgende drie dekades aan werk.

Skool was nie vir my baie uitgedagend nie en het ek gereeld oplossings gesoek om my skoolwerk uit die pad te kry sodat ek met my doelwitte kon begin. In Std 8 begin Chris Schutte en ek by die OK op 13de Straat werk. In Std 9 voeg ek ’n tweede werk by om vroegoggend voor skool die verspreiding van Beeld met 30 skoliere te koordineer. Kort daarna voeg ek ’n derde werk by toe ek deel van Union Caterers se privaat funksie span word wat onder andere partytjies gereel het vir Anneline Kriel toe sy Tuks Joolkoningin, en Vera Johns toe sy Mej. Suid-Afrika, geword het.

Suid Afrika

Na matriek het Era en ek Bourekenkunde aan Tukkies gaan studeer. Ek was huisvoorsitter, voorsitter van die skaakklub, een van die redakteurs by die studentekoerant en het op verskeie studenteraadskomitees gedien. Ons moes ons derde tot vyfde jaar voltyds werk om ons artikelskap te voltooi om te registreer as Bourekenaars. Daarna is ek Genieskool toe in Kroonstad vir my eerste dienspligjaar. Gedurende my tweede jaar word ek Pretoria toe verplaas en begin ek deeltyds ’n konstruksiemaatskappy wat huise in Moreletapark bou. Na diensplig word ek vennoot by CP de Leeuw, twee jaar later besturende direkteur van die Instituut van Eiendomsagente van Suid-Afrika, en twee jaar daarna assistent-hoofbestuurder van ABSA. Gedurende die tyd voltooi ek twee nagraadse diplomas en my meestersgraad.

Toe my Ma in 1990 onverwags met breinkanker gediagnoseer is, het ek my pos by ABSA bedank om voltyds aan haar sy te wees gedurende haar laaste nege maande. Gedurende die tyd skryf ek my eerste boek asook drie besigheidsplanne. Na haar afsterwe bring ek ’n internasionale eiendomsgroep, ERA Real Estate, na Suid-Afrika en bou dit op na 122 kantore; begin ’n tegnologie-onderneming met sewe banke as aandeelhouers (die firma staan vandag bekend as Property24) en dien as besturende direkteur vir die eerste vier jaar; voltooi die Ipi Tombi-klankbaan en stel die fliek vry by die Cannes Filmfees; en konsolideer vyf maatskappye saam om die grootste eiendomsagentskap in Suid-Afrika te skep. Ek word deur die Afrikaanse Handelsinstituut as Sakeman van die Jaar vir Gauteng aangewys. 

Verenigde State

Die volgende doelwit was om te kyk of dit moontlik was om in die wêreld se grootste mark suksesvol te wees. In 1994 immigreer ons (Era, ek en ons twee seuns) na Kalifornië. Na drie jaar word ek aangestel as president van ’n wêreldwye eiendomsmaatskappy met meer as 2 000 kantore en 26 000 agente. Ek word deur NAR (die grootste eiendomsassosiasie in die wêreld) aangewys as een van die 20 mees invloedryke persone in die eiendomsbedryf.

In 1998 besluit ek om weer eens my eie besigheid te begin, en in die daaropvolgende drie dekades stig ek tien ondernemings en skep meer as ’n duisend werksgeleenthede. Ek is deel van ’n span wat ’n maatskappy publiek neem, en begin ’n eiendomsnuusdiens wat vandag een van die drie grootste in die VSA is. Ek is steeds aktief betrokke by verskeie maatskappye en dien as uitvoerende voorsitter van vyf.

Pen tot Podium

’n Ander doelwit was om ’n bekende skrywer te word. In 1998 publiseer ek my eerste boek in die VSA. Vandag het ek 55+ boeke en verslae onder my belt, oor onderwerpe soos eiendomswese, tendense, tegnologie en bestuur. My boeke het op 18 topverkoperlyste verskyn, insluitend The New York Times, Wall Street Journal, USA Today en Amazon, en is in verskeie tale onder andere Spaans, Sjinees en Italiaans, vertaal. Ek is selfs deur Donald Trump gevra om ’n hoofstuk vir een van sy boeke te skryf.

Om ’n gesogte spreker te word was ook ’n doel. Vandag het ek meer as 1,500 toesprake aan meer as ’n miljoen mense (op ses kontinente) gelewer, en het die verhoog al gedeel met CEO’s van maatskappye soos AT&T, Campbell’s Soup en Chipotle; met TV-persoonlikhede soos Daymond John van Shark Tank; en kabinetslede soos Scott Turner, die nuwe Amerikaanse Secretary of Housing and Urban Development.

Familie en Reis

Era en ek het begin uitgaan op universiteit tydens ons tweede jaar. Ons is getroud nadat ons ons grade voltooi het, en het besluit om eers met ’n gesin te begin nadat ons albei vyf jaar aan ons loopbane gewy het. Vandag het ons twee seuns, albei getroud, en albei het vir my gewerk vir ’n gesamentlike tydperk van 20 jaar. Ons het ook vier pragtige en gesonde kleinkinders, met ’n vyfde op pad. Kleinkinders is een van die grootste seëninge in die lewe. Ons is al 25 jaar trotse Amerikaanse burgers.

Ons is ook baie lief vir reis en het al baie unieke ervarings beleef, soos om op die Groot Muur van China te stap; Machu Picchu te klim; die Taj Mahal te besoek; Elizabeth Taylor en Sylvester Stallone by die Cannes-filmfees te ontmoet; woon vandag op dieselfde straat as Carlos Santana; Mark Zuckerberg bly tien minute van ons af op Kauai; ons het die Super Bowl verlede jaar met Jeff Goldblum bygewoon; ’n dinee met Oprah Winfrey, Andre Agassi, Bo Derek en Jay Leno bygewoon; is na die eerste Amerikaanse vertoning van Andrea Bocelli se seun genooi; was by die opening van ABBA se holografiese vertoning Voyage in Londen; Simon & Garfunkel se Old Friends final tour beleef; en sien Pierce Brosnan so nou en dan by ons plaaslike winkels op Kauai.

Refleksie

Die wêreld is ’n skatkis van ontdekkings en vreugdevolle ervarings, maar ook ongelukkig vol hongersnood, onreg en hartseer. Wysheid en reis kweek dankbaarheid en nederigheid. Gevolglik is ons aktief betrokke in verskeie liefdadigheidsorganisasies, veral die wat die opvoeding van keiki (kinders) en die mediese dienste van kupuna (ou mense) bevorder. Ons is meestal op Kauai, 13 000 km van Pretoria af. Om na vyf dekades weer kontak te hê met klasmaats in Pretoria (en dwarsoor die wêreld) is surrealisties!

Maluhia, aloha a me ka mahalo i nā kānaka a pau. (Vrede, liefde en dankbaarheid aan almal).